Вашата шифра: Pepelaska
Имам потреба од: Психолог
Порака: Имам проблем со семејството, маж ми постојано пие и нѐ навредува. Ќерка ми е многу емотивна и падна психички, не се дружи, не излегува, нема волја и постојано е на социјалните мрежи. Син ми постојано се кара со сите, сите му се криви. Има 24 години и само бара пари, а незаинтересиран е за работа. Предложив да одиме на психолог, но за жал не прифаќаат. Ве молам за помош и совет.
Oдговор:
Почитувана Pepelaska,
Ви благодарам што ни се обративте за совет. Од Вашиот допис можам да увидам дека семејната ситуација не е во најдобар ред. Сакам да Ве пофалам за Вашата ангажираност и иницијатива да одите на психолог како семејство. Вообичаено е луѓето да имаат отпор да одат на психолог на почеток, меѓутоа доколку го согледаат проблемот, не е необично да го променат мислењето. Одењето на психолог заедно со семејството е одлична идеја, но за почеток би Ви предложила да тргнете сама и да бидете пример дека одењето на психолог е всушност корисно. Секој се справува со проблемот на свој начин, сопругот со алкохолот, ќерката со зголемената употреба на социјалните мрежи, а синот со исфрлање на гневот. Меѓутоа е очигледно дека постои проблем за кој е добро да се зборува отворено и да се види кој со што се мачи и да се слушнете меѓусебе и да си пружите емпатија, поддршка, разбирање, уважување на потребите и чувствата без осудување. Ситуацијата делува покомплексна и бара повеќе од онлајн советување. За да Ве поддржиме најдобро што можеме, ни требаат повеќе информации за ситуацијата. Затоа Ве охрабрувам да се јавите на бесплатната СОС Линија (141-700) или да го посетите нашето советувалиште и да закажете бесплатна средба со нашиот тим кој го сочинува правник, психолог и социјален работник.
Одговара: Елена Василева – психолог, во рамки на Советувалиштето при Национален совет за родова рамноправност.
Дигиталното советувалиште е поддржано од Комерцијална Банка АД Скопје, во рамки на проектот „Дигитализација и дигитална видливост на услугите на Советувалиштето при НСРР и СОС линијата за жени – жртви на семејно насилство“.