Шифра: Неправда
Имам потреба од: Психолог
Порака: Здраво, пред 7 години работев во една фабрика и психички паднав, кога една моја колешка и другарка со која се дружевме беше падната психички и ми беше стресно кога ја видов таква изгубена и расплакана. Таа и нејзиното семејство бараа помош од мене, но откако и помогнав и јас паднав психички, почнав да се сомневам во себе и да немам самодоверба. Ова ме промени многу, не сум истата личност. Претходно имав самодоверба и бев работоспособна. Некој од работа дури и ме пријави, но зошто не знам, дали и/му било страв дека паднав психички или нешто друго. Немам самодоверба, и не знам како да се однесувам со една колешка која има завршено факултет, не знаев како да и речам ни здраво, се сомневав во себе. Доживеав и да фрлат пенкало по мене и да ми пишуваат пораки, да удрат со кола во мојата куќа, ме имитираа како одам и ми се смееја, ми го хакнаа профилот, а газдата иако свесен за случувањата, не направи ништо. Колешката беше добра и не беше како нив, меѓутоа потоа и таа стана иста, и после тоа паднав психички, и таа не ми помогна. Имав само 25 години, ако не и помала… Со еден починат родител сум, живеам само со мајка ми и. Ме оставија сите пријатели, и кајшто работев приватно никој не ми подаде рака, се чувстував сама. Само мајка ми беше тука за мене. Денес, имам 35 години и не можам да најдам работа, никој не сака да ми даде шанса, а секаде аплицирам. Мислам дека шират гласини за мене од претходното работно место. Фабриката денес е затворена, меѓутоа поранешните колеги сеуште имаат критички однос кон мене. Среќа, живеам со мајка ми па имам што да јадам. Нанесена ми е голема неправда. Млада и неискусна, не си ги знаев тогаш кои ми се моите права, дури и ми направија да имам проблеми со законот. Сега не можам да функционирам нормално во општество. Ако може да ми помогнете затоа што сеуште не си ги знам правата.
Одговор:
Почитувана,
Никој не заслужува да биде исмеван и малтретиран, како на работното место, така и во социјалната средина. Иако во Вашиот допис велите дека сте психички падната, сакам да Ве пофалам што се обраќате за помош, бидејќи тоа значи дека ја согледувате моменталната ситуација и сакате да Ви е подобро. Опишаните случувања се пример за мобинг и психичко насилство на работно место и денес имаме посебен закон кој се занимава со ова прашање. Изложеноста на мобинг и психичко насилство можат да имаат негативни ефекти кај личноста за кои често е потребна професионална поддршка. Од Вашиот допис, можам да заклучам дека ситуацијата е покомплексна и затоа Ве охрабрувам да се јавите на бесплатната СОС Линија (141-700) или да го посетите нашето советувалиште и да закажете средба со нашиот тим кој го сочинува правник, психолог и социјален работник.
Одговара: Елена Василева – психолог, во рамки на Советувалиштето при Национален совет за родова рамноправност.
Дигиталното советувалиште е поддржано од Комерцијална Банка АД Скопје, во рамки на проектот „Дигитализација и дигитална видливост на услугите на Советувалиштето при НСРР и СОС линијата за жени – жртви на семејно насилство“.