Вашата шифра: 0712
Имам потреба од: Психолог
Порака: Здраво. Во брак сум веќе 16 год. Имаме две деца (15 год. и 9 год.) Моментално сум бремена за трето и треба да се породам наредната недела. Мојот проблем е што во овој брак се чувствувам навистина несреќна. Во почетокот живеевме со родителите на сопругот и имавме реални проблеми (секаков вид на насилство- физичко, психичко, емоционално). Се разбира, тоа остави големи последици кај мене и предизвика сериозна анксиозност. Како и да е, решивме да продолживме, се преселивме и ни се роди второто дете. Најголемиот проблем е во тоа што сопругот комуницира со мене многу малку, само кога сака и постојано ме става во некакво исчекување. Значи за се што и да правам, очекувам потврда од него. Воопшто не комуницира за емоции туку комуникацијата се одвива формално само она што треба да се направи се прави и тоа е тоа.
Целиот период од нашиот брак сум со голема желба да го прекинам, но секогаш кога и да сакам тоа да го направам тој се менува, целосно е тука, и почнуваме да функционираме и јас станувам среќна, но не за долго. Заедно имаме постигнато многу материјално, но целата заслуга оди кај него затоа што и двајцата долги години работевме на неговата кариера. Мојата секогаш беше неважна или половична. Последен пат кога сакав да го завршам бракот решивме двајцата да се вложиме и да работиме на нашата врска. Тоа трае отприлика една година, каде што и останав бремена. Го доживеавме тој момент како подарок за нашата работа, имаше промени, но како што изминуваше бременоста, тој се врати на старото однесување. Моментално воопшто не се гледаме, јас сум целосно сама, рано заминува на работа ( работи приватно со работници), касно се прибира.
За се има време, за сите околу, направи голем чекор во бизнисот, само јас останав повторно сама. Целата бременост ми е со лежење и се чувствувам навистина ужасно. Пробувам да разговарам, но немам никаков прием. Не можe ни 5 минути да седи со мене, ќе ми рече само – „Срцка, имам работа“, станува и заминува. Повторно размислувам за развод, повторно се најдов во незгодна ситуација и повторно ме мачи истиот проблем. Сметам дека немам никакви чувства кон него, навистина премногу се вложив, не успеав сама да се запознаам себе си, трчајќи да го направам тоа што треба. Се чувствувам гладно за љубов, осамено, расеано… да споменам дека имам лош однос со мојата мајка. Воопшто не комуницираме и се наоѓам себе си во ситуација да немам никој. Навистина би го ценела вашето мислење. Ви благодарам.
Одговор:
Почитувана 0712,
Како што разбирам од вашиот допис, моментално се наоѓате во чувствителна состојба, кога е потребна поддршка, за која велите дека ја немате во текот на бременоста на начин на кој ви е потребна, ниту од партнерот, ниту од страна на вашата мајка. Истовремено, разбирам дека имате желба подолго време да излезете од овој брак, но секој пат кога ќе се почуствувате поблизу до носење на таква одлука, се случува сопругот да го промени однесувањето и да се премислите, а потоа повторно чувствувате незадоволство од понатамошната комуникација. Велите дека изминатите години имате вложено и дадено поддршка во професионалниот развој на вашиот сопруг, додека својот развој на професионален план сте го оставиле во втор план.
Со оглед на моменталниот контекст во кој се наоѓате – кои се вашите извори на поддршка? На кои лица можете да им се доверите и со кого може да разговарате, без разлика дали се работи за пријатели, роднини, или стручни лица? Вашата добросостојба е најважна, особено додека сте бремена. Доколку трпите насилство, ви препорачувам да се јавите на нашата СОС линија 141 700, која е бесплатна и достапна 24 часа, без разлика дали имате потреба од разговор или сакате да го пријавите насилството.
Од динамиката на односот што ја опишувате со вашиот партнер, имам впечаток дека се повторува образец кој со текот на времето одново ви носи нов бран незадоволство, изолација и осаменост. Повеќе околу циклусот на насилство и неговата динамика може да прочитате на овој линк. Препорачувам да ја приоретизирате вашата безбедност во овој момент и да размислите што сакате за себе во наредниот период, со оглед на доаѓањето на ново бебе. Што може да ви биде од помош во следниот период? Како сакате вашиот живот да изгледа во текот на наредните неколку години? Какво е влијанието на вашиот партнерски однос врз вашето здравје и добросостојбата на децата? Доколку одлучите да останете во тој однос, кои се вашите потреби и барања? Дали сметате дека има отвореност од двете страни за понатамошен развој, кој ќе биде во согласност и со вашите желби и потреби? Доколку одлучите да го прекинете бракот препорачувам најнапред да се консултирате со правник и да се запознаете со вашите права и одговорности.
Во рамки на НСРР функционира бесплатно советувалиште сочинето од психолог, правник и социјален работник, може да закажете термин преку СОС линијата 141 700, или директно преку 02/3134-390.
Одговара: Ана Тодоровска, психолог / практичар на експресивна арт терапија, во рамки на Советувалиштето при Национален совет за родова рамноправност.
Дигиталното советувалиште е поддржано од Комерцијална Банка АД Скопје, во рамки на проектот „Дигитализација и дигитална видливост на услугите на Советувалиштето при НСРР и СОС линијата за жени – жртви на семејно насилство“.