Вашата шифра: Коцкање
Имам потреба од: Психолог
Порака: Дали постои можност за одвикнување од коцкање?
Одговор:
Луѓето започнуваат со игри на среќа поради различни причини – забава, осаменост, социјализација, потрага по начин со справување со стресни животни ситуации и промени, бегство од стрес, надеж за добивка, потрага по возбуда итн. Во текот на играње игри на среќа и коцкање, се лачи голема количина допамин, хормон кој дава чувство на задоволство и мотивација – кога очекуваме награда, како што е потенцијалната добивка при коцкањето, нивото на допамин се зголемува, а со тоа и нивото на возбуда и задоволство. Во моментот на добивка, се случува наплив на допамин, со што, секој нареден пат, се повеќе се зголемува веројатноста лицето да го повтори однесувањето. На тој начин, потрагата по мала возбуда и забава, може да доведе до создавање зависност, а со понатамошниот тек може да доведе до големи финансиски загуби, семејни проблеми, економско насилство и ризик од бездомништво.
Како да препознаеме кога коцкањето станало зависност?
- Кога лицето почнува да троши повеќе пари на игри отколку што може да си дозволи
- Кога лицето се обложува во време кога има други обврски кои постепено ги запоставува – работа, договорени планови, време поминато со семејството и пријателите
- Оди да се обложува секој пат кога се соочува со конфликти и стресни ситуации, како начин за справување со стресот и своите чувства
- Лицето започнува да лаже за својата навика, да позајмува или да краде средства со цел да ги вложи во игри на среќа
- Појава на вознемиреност при обид да се прекине, неуспешни обиди за контрола и прекин на коцкањето
Процесот на одвикнувањето од коцкање зависи од повеќе фактори, како времето вложено во коцкање, степен на семејна поддршка, отвореност кон признавање и препознавање на проблемот, како и волја за одвикнување. Притоа, важно е да се консултира стручно лице (психијатар / психотерапевт) и да се изработи индивидуална или учество во групна програма за одвикнување. За овој тип зависност, добри резултати покажува правецот познат како Когнитив Бихејвиор психотерапија. Препорачувам консултација со психотерапевт, со цел не само да се промени однесувањето, туку и да се работи на причината која довела до тоа однесување.
Одговара: Ана Тодоровска, психолог / практичар на експресивна арт терапија, во рамки на Советувалиштето при Национален совет за родова рамноправност.
Дигиталното советувалиште е поддржано од Комерцијална Банка АД Скопје, во рамки на проектот „Дигитализација и дигитална видливост на услугите на Советувалиштето при НСРР и СОС линијата за жени – жртви на семејно насилство“.