Вашата шифра: Ми треба помош околу тоа како да излезам од тригодишна врска со нарцис, после низа на манипулации од негова страна
Имам потреба од: Психолог
Порака: Јас (женско) веќе сум во тригодишна врска со момче за кое неодамна, после низа истражувања на основа и поттикнати од неговото однесување кое за мене беше необично и турбулентно, открив дека всушност тоа однесување е карактеристично за личност со нарцисоидно пореметување. Тотално сум во шок, повлечена личност сум, не ги споделувам љубовните проблеми со никого и после тригодишна врска фактот дека тој е всушност нарцис ми е и ден денес многу тежок да го прифатам. Случајно наидов на теми и видеа поврзани со нарцисите на социјалните мрежи и во нив, буквално веднаш по симптомите го препознав моето момче. Ќе наведам дел одлошите работи кои ми биле направени од негова страна: сум била вербално навредувана од него, го исклучуваше телефонот кога ќе се изнервираше, сум била пцуена од негова страна, кога работите не беа по негово се лутеше, не се јавуваше и по цели ноќи такашто добивав silent третман од негова страна, сум била избркана од неговата кола затоа што плачев и не сакаше да го срамотам, сум била оставена цела ноќ да плачам додека тој мирно си легна и заспа, сум била заклучена надвор (краток период, но како еден вид на казна од негова страна затоа што не го послушав), ми има кажано дека со мене бил некој период само ради реда, не за убавина туку затоа што имам добри квалитети како личност (лојална, културна), инаку немало да биди со мене ако воопшто не сум ги поседувала овие вредности, негираше упорно нешто што навистина го направи, иако му приложив доказ (gaslight), не ми искажуваше никакво внимание во јавност (буквално изгледаше како да не сме во врска), го штитеше својот телефон и не ми овозможи никогаш никаков пристап до него и уште некои други работи, но тие се најкарактеристичните што ме наведоа да размислам дали неговото однесување е нормално. Дел од овие работи како укажување внимание во јавност се подобрија со молење од моја страна и откако докажав дека сум спремна да го оставам.
Друг меѓу најголемите проблеми во мојата врска, во последно открив дека е и зависник од порнографија, гледа непристојни работи на социјалните мрежи, користи апликации и е во групи кадешто се испраќаат непристојни содржини, следи жени кои произведуваат порнографски содржини, зачувува дел од нив на телефонот, со другарите си испраќаат такви содржини (божем било тоа шала). Кога го прашав дали е зависник, негираше и рече дека не го интересираат тие работи. Се обиде и да се правда дека не правел ништо туку дека само гледал, а стравувам дека би можел во иднина да излези од контрола и да ме изневери, затоа што приметив дека и во реалноста се загледува во девојки кои се непримерно облечени. Се чувствувам катастрофално, знам дека ова не го заслужувам и не толерирам зачувување на никакви неприкладни содржини и следење на жени кои истите ги произведуваат, мојата самодоверба е покосена на нула, а и воопшто не му верувам. Ова не е партнерот што го сакам во мојот живот, ваков не е тој. Знам дека ова мора да го завршам, но немам храброст како. Се обидов неколку пати, но ми купуваше скапи подароци само за да ми докаже дека ме сака и никако не можам да го оставам. Треба и заедно да одиме во странство на работа, платени се документите за таму, не знам како да откажам. Секој ден ме јадат овие мисли дека мора некако да излезам од оваа врска, не се чувствувам доволна за него и секојпат се присеќавам на неприкладните содржини и снимки од девојки од Интернет кои ги видов зачувани на неговиот телефон. Порано го сакав повеќе, сега љубовта што ја чувствувам и довербата повеќе не се исти. Веќе го запознав со мојата фамилија, а и тој мене со неговата. Многу ми е срам да раскинам од моите, секаде сум го носела со мене, особено во последно… Многу Ве молам за некој совет, како да излезам од оваа врска, како да раскинам, во живо или преку телефон? Се плашам дека ќе направи нешто, некој скандал, знам дека нема да го прифати раскинувањето, немало да се откаже лесно од мене, што да правам Ве молам кажете ми, премногу очајувам? Ви благодарам однапред.
Почитувана,
Благодарам за деталниот опис на ситуацијата во која се наоѓате. Од вашиот допис, забележувам дека во периодот на овие три години сте се соочиле и минувате низ цел спектар на состојби – шок, изненаденост, тага, недоверба, одлучност за прекинување на односот, страв, срам, очај, кои со тек на времето може да доведат до емоционална исцрпеност. Според наведените однесувања од страна на партнерот, сте поминале низ различни форми на психичко насилство, манипулација и злоупотреба, додека секој заслужува да биде виден и почитуван во еден партнерски однос. Со вас споделувам линк за формите на насилство, може да препознаете некои облици од вашето искуство тука.
Сакам да ве потсетам дека во овој момент е многу важно да го поставите за приоритет сопственото ментално здравје, сопствената безбедност и да ја зајакнете сопствената отпорност за да можете да поставите јасни граници во овој однос. Земете неколку моменти и напишете ги сите оние практики, начини и места на кои се чувствувате свои, опкружете се повторно со луѓе со кои се чувствувате безбедно и доверете ги вашите грижи на лица кои ви се блиски и во кои имате доверба. Препорачувам работа со психолог / психотерапевт за зајакнување на вашите граници.
Во однос на срамот што го чувствувате пред семејството и опкружувањето – обидете се отворено да разговарате за тоа што ви се случува и запомнете дека одлуката е само ваша. Вие сте таа која се наоѓа во партнерскиот однос, која поминува низ ситуациите и додека околината има право да го каже своето мислење, само вие сте таа која има право да одлучи за останување или прекинување на односот. Изразувате одлучност за прекин на врската, па според вашето искуство, размислете кој е најбезбеден начин за вас во моментот да направите прекин. Притоа, соопштете ја вашата одлука јасно и со цврст став, без да се вовлекувате во претерано објаснување или оправдување. Доколку има потреба, направете блокада на сите форми на контактирање – пораки, меилови, социјални мрежи и дозволете си период на отсуство од тој контакт, со цел повторно да си ја вратите самодовербата.
Што се однесува до договорот за работа – внимателно прочитајте го договорот што сте го потпишале во делот на условите за прекин, доколку се одлучите да не одите. Нашето советувалиште ви стои на располагање за бесплатна правна консултација.
Доколку се чувствувате загрозено и се плашите за вашата безбедност, пријавете го случајот во полиција. Запомнете, демнењето е кривично дело. Исто така, нашиот тим ви стои на располагање 24 часа, на бесплатната СОС линија 141 700. Дополнително, нудиме бесплатно советување со психолог, правничка и социјална работничка, вашиот термин може да го закажете преку СОС линијата или меилот sovetuvaliste@nsrr.org.mk, онлајн или во нашите простории во центарот на Скопје.
Одговара: Ана Тодоровска, психолог / практичар на експресивна арт терапија во рамки на Советувалиштето при Национален совет за родова рамноправност.
Дигиталното советувалиште е поддржано од Комерцијална Банка АД Скопје, во рамки на проектот „Дигитализација и дигитална видливост на услугите на Советувалиштето при НСРР и СОС линијата за жени – жртви на семејно насилство“.