Вашата шифра: Мојата Илина
Имам потреба од: Психолог
Порака: Мојот маж се коцка, но и знае да е насилен, да ме тепа, не ми дава да одам кај моите. Имаме една ќерка од 7 месеци. Ми треба совет.
Почитувана,
Семејното насилство речиси секогаш се случува во комбинирана форма, а од вашиот допис препознавам облици на економско, физичко и психичко насилство. Верувам дека се соочувате со огромна тежина и ви честитам на храброста што се одлучивте да побарате поддршка и да проговорите за ситуацијата со која се соочувате.
Најнапред би сакала да нагласам дека вие не сте виновна за однесувањето на вашиот сопруг. Сторителите на семејно насилство често користат низа стратегии со кои се обидуваат да воспостават контрола и моќ врз жртвата, меѓу кои се удирање, контрола на движењето (контакт со блиските), а често пројавуваат и облик на зависност (злоупотреба на алкохол, коцкање), за кои е потребен посебен стручен третман за одвикнување. Споделувам дел од овие однесувања со вас тука, на овој линк, со цел подобро да препознаете што се случува во секојдневието.
Важно е што сакате да направите во врска со вашата ситуација:
– Дали сте разговарале со вашето семејство за тоа што ви се случува, колку се тие за вас безбедна средина и дали имате нивна поддршка? Вашата безбедност и сигурност се на прво место.
– Доколку имате видливи физички повреди, веднаш одете на лекарски преглед во болница и нагласете дека станува збор за повреда од семејно насилство, за што ќе добиете медицински извештај кој служи како доказ што се приложува при пријава на семејно насилство.
– Постои опција да го пријавите случајот во локалниот Центар за социјална работа, побарајте социјален работник кај кој ќе пријавите случај на семејно насилство, а потоа во текот на вашиот разговор ќе одлучите како сакате да постапите и кои мерки на заштита да бидат преземени, доколку се чувствувате загрозена. Постојат повеќе мерки за заштита – забрана за приближување, забрана за навреди и малтретирање, мерка за задолжително лекување итн. Исто така, настанот може да го пријавите во полиција.
– Доколку сте спречени да го напуштите домот, тимот на Центарот за социјална работа може да ве посети. Исто така, доколку сте спречени да го пријавите настанот, може ние тоа да го направиме за вас, обезбедувајќи ги вашите лични податоци со ваша согласност.
– Јавете се на нашата бесплатна СОС линија, 141 700, која е достапна 24 часа, може да поразговарате со операторките, без разлика дали имате потреба од сослушување или потреба од конкретни насоки за постапување.
– Нудиме бесплатно советување со психолог, социјален работник и правник, доколку имате потреба, закажете го вашиот термин преку СОС линијата.
Одговара: Ана Тодоровска, психолог / практичар на експресивна арт терапија во рамки на Советувалиштето при Национален совет за родова рамноправност.
Дигиталното советувалиште е поддржано од Комерцијална Банка АД Скопје, во рамки на проектот „Дигитализација и дигитална видливост на услугите на Советувалиштето при НСРР и СОС линијата за жени – жртви на семејно насилство“.